Duoðáštan, O Ipmilan, ahte leat sivdnidan mu dovdat Du ja bálvalit Du. Buvttán ovdan dán bottus iežan geanohisvuoða ja Du fámolašvuoða, iežan geafivuoða ja Du riggodaga. Ii leat mihkkige eará Ipmiliid, go Don, Veahkki heaðis, Iešalddes bissovaš.

Bahá’u’lláh

Sivdniduvvon lea báiki ja dállu ja guovlu ja gávpot ja váibmu ja várri ja suodji ja biedju ja avži ja eana ja mearra ja suolu ja gieddi, gos Ipmila námma lea muitaluvvon ja Su gudni bajiduvvon.

Bahá’u’lláh

Iđit

Mun lean lihkkan Du suodjalusas, o Ipmilan, ja dat guhte duon dorvvu ohcá galgáge orodit Du suodjalusa bassi lanjas ja Du várjalusa muvrraid siste. Čuovgga siellun Du almmustusa iđitgukso čuovggain nugo du addálasvuođa iđitčuovga čuovggai olgguldas hápmán.

Bahá’u’lláh

Eahket

O Ipmil, mu hearrá, Háluidan ulbmil! Dát Du bálvaleaddji ohcala oađđit Du árpmu suojis ja vuoiŋŋastit Du čábbodaga suoji vuolde ja átnut Du várjalusa ja suodjalusa. Bivddán Du, O Hearrán, Du čalmmiinatguin, mat eai oađe, várjalit čalmmiidan oaidnimis eará go Du. Nanusmahte dasto sin čalmmiid, ahte sii oainnašedje Du mearkkaid ja doalahivčče Du almmustuhttima almmiravdda. Don leat Dat, Gean buotveagálašvuođa almmustusaid ovddas fámuin stuorimusatge leat dorggiidan. Ii leat mihkkige eará Ipmiliid go Don, Buotveagalaš, Buot siskkimuš leahkin, Eavttuheapmi.

Bahá’u’lláh

Lagašvuohta Ipmilii

Lávllo, o bálvaleaddján dutnje addojuvvon Ipmila vearssaid, nugo dat guđet leat Su lagašvuhtii geassádan leat daid lávlon nu, ahte šuoŋat čábbodat cahkkehivččii buot olbmuid váimmuid. Gii lanjas oktovuođas lohká Ipmila almmuhan vearssaid, Su njálmmi cealkin sániid njálgga hája bohtet Buotveagalačča gilvima eŋgelat lebbet viidát ja ožžot juohkeovtta vuoiggalaš váimmu coahkkit. Vaikke son álggus livččiige dan vuoimmis diehtemeahttun, de guittotge sutnje addojuvvon árpmu fápmu boahtá ovdal dahje maŋŋil su sillui váikkuhit. Ná lea Ipmila Almmuhusa suollemasvuođat ásahuvvon Su Dáhtu mielde, Mii lea fámu ja viisodaga Vuođđogáldu.

Bahá’u’lláh

Du njálgga hájat agálašvuođa rávnnjiin atte mu juhkat, O Ipmilan, ja Du leahkima muora heđemiid divtte mu smáhket, O Doaivun. Du ráhkisvuođa kristallagálduin divtte mu juhkat, O Gudnán, ja Du agibeai' bisti láđisvuođa suoivanii divtte mu ásaiduvvat, O Čuovgan. Du lagašvuođa niittuin, Du leahkima ovddas divtte mu nagodit vádjolit, O Ráhkásan, ja Du árpmu ruvnnu olgešgieđa bealde atte munnje čohkkánsaji, O Hállun. Du njálggahájat ilu vuoiŋŋanasaid divtte bossut badjelasan, O Ulbmilan, ja Du duohtavuođa paradiissa allodagaide divtte mu beassat sisa, O mu Hervošeami mearri. Du oktavuođa duvvá šuoŋaid atte mu gullat, O Don guhte leat čuovgi, ja Du fámu vuoiŋŋa ja mávtta bokte ealáskahte mu, O Sállejeaddján. Du ráhkisvuođa vuoiŋŋain doala mu nanusin, O mu Biebmi ja Du miellabuori bálgá alde daga lávkkiidan sihkkarin, O Sivdnideaddján! Jápmemeahttunvuođat šaddogárddis, Du čábbodaga ovddas, divtte mu orodit agibeaivve, O Don guhte leat árbmogas munnje, ja Du gudni čohkkánsaji ala bija mu, O Don guhte leat mu Oamasteaddji. Du ráhkisteaddji láđisvuođa albmái bajit mu, O mu Ealáskahtti, ja Du oahpistusa guovssonásttiin láide mu, O Don mu Geasuheaddji. Atte mu leat Du oaidnemeahttun almmustusa ovddas, O Don guhte leat mu Álgu ja Stuorimus Doaivva, ja Du čábbodaga njálgga hájaid sisa, maid Don almmustuhtat, divtte mu máhccat, O Don guhte leat mu Ipmil. Fámolaš leat Don dahkat dan, maid hálidat. Don leat duođalaččat Rámiduvvon, Šearradamos, Buot Alladamos.

Bahá’u’lláh

Atte munnje buhtes váimmu, O Ipmilan, ja ođasmahte ráfálaš diđolašvuođa mu siste, O Doaivun. Fámu vuoiŋŋain nanusmahte mu Du áššis, O Ráhkásepmosan, ja Du gutni čuovggain čájet munnje bálgát, O Don guhte leat mu hálu Ulbmil. Du geažihis fámu mávttain bajit mu Du bassivuođa albmái, O Don guhte leat mu leahkima Gáldu, ja Du agálašvuođa vuoiŋŋanasaiguin ilosmahte mu, O Don guhte leat mu Ipmil. Divtte Du agálaččat bisti šuoŋaid addit ráfi munnje, O Guoibmán, ja divtte Du dološ lohkameahttun riggodagaid luvvet mu buot earás earet Dus, O Meaštáran, ja divtte Du billašuvakeahtes siskkimučča almmustusa sivdnádusaid buktit munnje ilu. O Don guhte leat buot almmustuhttimiid almmustuhttin ja buot čihkosamos čihkosepmosiid siste.

Bahá’u’lláh

Ale hála bahá, ammas it gullat baháid, alege stuorit earáid vigiid, ammas Du iežat vigit orrut stuorrát.

Bahá’u’lláh

O Ipmil! Láide mu, várjal mu, cahkket mu váimmu čuovgga ja daga mu šerres nástin. Don guhte leat Fámolaš ja Gievra.

‘Abdu’l-Bahá

O Ipmil! Virkkosmahte ja ilosmahte mu sielu. Buhtis mu váimmu. Oðasmahte mu fámuid Guoðán buot áššán Du gihtii. Don leat mu Ofelaš ja mu Oadjebasvuohta. In leat šat morašlaš inge giksašuvvan, mun lean lihkolaš ja ilolaš. O Ipmil! In leat šat dievva áŧestusa, inge divtte fuolaid váivvidit iežan. In divtte eallima váivves áššiid ráfehuhttit iežan. O Ipmil! Don leat eanet ustit munnje, go maid mun lean alccen. Basuhan iežan Dutnje, O Hearrá.

‘Abdu’l-Bahá

Ustitvuohta

Ustitlaš giella lea olmmošváimmuid geasuheaddji. Dat lea vuoiŋŋa láibi, dat gárvvoha sániid mearkkašumiiguin, dat lea viisodaga ja áddejumi čuovgga gáldu.

Bahá’u’lláh

Allet duða dasa, ahte čájehehpet ustitlašvuoða duššebeare sániiguin; dovdet váimmuineattet buolli ráhkisvuoða buohkaid guovdu, geat johtet bálgádet rastá.

‘Abdu’l-Bahá

Go jurdda soaðis buollá, vuostálastet dan gievrrat jurdagiin ráfis. Vaššimielat jurdaga galgá duššadit fámolut jurdagiin ráhkisvuoðas.

‘Abdu’l-Bahá

Jos ustit dovdá ráhkisvuođa nuppi guovdu, son sávvá sáhttit dadjat dan. Vaikke son diehtá ustibis leat diđolaš su ráhkisvuođas, iigo son liikkáge sáva oažžut dadjat dan? – – Ipmil diehtá buot váimmuid sávaldagaid, muhto mokta rohkadallamii lea lunddolaš ja bohciida olbmo ráhkisvuođas Ipmilii.

‘Abdu’l-Bahá

Mánát

O Ipmil! Čuvge dáid mánáid. Dát mánát leat Du heđengárddi šattut, Du niittu rásit, Du šaddogárddi ruvssut. Divtte arvvát láktadit sin; atte Duohtavuođa Beaivváža Ráhkisvuođainnat báitit sin ala. Divtte Vuoiŋŋanasat virkkosmahttit sin nu, ahte sii áhtanuššet, šaddet ja ovdánit ja čuvget geažihis čábbodagas. Don leat Árvvas. Don leat Láđisváimmot.

‘Abdu’l-Bahá

O Hearrá! Bija dán njuoras vesá šaddat valljodagaidat šaddogárdái, njuoskat dan Láđisvuođat gálduin ja divtte dan šaddat Oiddut ja Árpmut rávnnjiid vehkiin válljugas šaddun. Don leat Mávttalaš ja Fámolaš.

‘Abdu’l-Bahá

Oktavuohta

Ipmila ulbmil olbmo sidvnidettiin leamašan ja boahtá čadat leat veahkehit olbmo dovdat Sivdnideaddjis ja ollet Su leahkimii. Dán alladeamos ulbmilis, dán šearradamos mihttomearis buot Almmálaš Girjjit ja ipmillaččat almmuhuvvon Árvvolaš Čállosat šiittekeahttá duođaštit. Guhte lea dovdan Ipmillaš Láidesteami Iđitgukso ja lávken Su bassi gárdimasas, lea geassádan Ipmila lusa ja ollen Su leahkimii. Leahkimii, mii lea duođalaš paradiisa ja mas almmi alladeamos orrunsajit leat dušše mearkan. – – Guhte ii leat Su dovdan, lea dubmen iežas gáiddusvuođa vártnuhisvuhtii, gáiddusvuođa, mii lea dievaslaš dušši ja gáđohusa dola duohtavuohta. Dakkár boahtá su galgámuš leahkit, vaikke son olgguldasat sáhttá čohkkát eatnáma alimus váldestuoluin ja ráđđet dan alladeamos váldegáhtu vuolde.

Bahá’u’lláh

O Don láđisváimmot hearrá, Don Guhte leat addálas ja návccalaš. Mii leat Du bálvaleaddjit Du sállemuša vuorddekeahtes árpmu suojis. Atte midjiide Du geahčastaga skeaŋkka. Atte čuovgga čalmmiidasamet, gulu beljiidasamet ja ipmárdusa ja ráhkisvuođa váimmuidasamet. Daga siellumet ilolažžan ja lihkolažžan Du ilu sivdnádusaid bokte. O Hearrá! Čájet midjiide Du gonagasgotti luotta ja virkkosmahte buohkaid Du bassi vuoiŋŋa vuoiŋŋanasaiguin. Atte midjiide agálaš eallima ja nohkameahttun gutni. Ovttas olmmošgotti ja illudahte olmmošlaš máilmmi. Čuovvot mii buohkat Du luotta, áibbašednot Du miellabuori ja ohccot Du gonagasgotti suollemasvuođaid. O Ipmil! Ovttas ja čana oktii váibmomet Du nohkameahttun báttiin. Duođalaččat Don leat Váibmoláđis ja Buotveagalaš.

‘Abdu’l-Bahá

Geahččalusat ja váttisvuođat

Leago oktage eará váttisvuoðaid Eret Váldi go Ipmil? Daja: Máidnojuvvon lehkos Ipmil! Son lea Ipmil! Buohkat leat Su bálvvat, ja buohkat vuollánit Su dáhttui.

Báb

Mun ohcalan Du Fámut bokte, O Ipmilan. Ale divtte mange ráfehuhttit mu geahččalusaid áigge, ja berošmeahttunvuođa bottuin oahpis lávkkiidan deaivat Du movttiidusa čađa. Don leat Ipmil, buotveagalaš leat Don dahkat dan, maid Don hálidat. Ii oktage sáhte vuostálastit Du Dáhtu iige Du Áigumuša.

Báb

Luohte Ipmilii. Hilggo iežat sávaldaga ja roahkkas Su sávaldagaidas.

‘Abdu’l-Bahá

Vuoiŋŋas lea váikkuhus; rohkosis lea vuoiŋŋalaš váikkuhus. Dan dihtii rohkadallat, ”O Ipmil! Buorit dán buohcci!” Soaitimis Ipmil vástida. Ovtta dahká, gii rohkadallá. Ipmil vástida juohke bálvaleaddji rohkosii, jos rohkos lea hohpolaš. Su árbmu lea viiddis, rájiheapmi. Son vástida buohkaid bálvaleaddjiidis rohkosiidda. Son vástida dán šattu rohkosii. Šaddu sáhttá rohkadallat, ”O Ipmil! Sádde munnje arvvi!” Ipmil vástida rohkosii ja šaddu šaddá. Ipmil vástida juohkeoktii.

‘Abdu’l-Bahá

Son lea Láđisváimmot, Buotveagalaš! O Ipmil, mu Ipmilan! Don oainnát mu, Don dovddat mu; Don leat Albmán ja Báhtaranbáikán. In geange leat mun ohcalan, inge ovttage mun ohcal; in mange bálgá leat mun johtán, inge ovttage bálgá boađe johtit earet Du ráhkisvuođa bálgá. Sevdnjes doaivvuhisvuođa ijas mu čalbmi jorggiha vuorddi ja dievva doaivvu Du geažihis buorrevuođa guvlui ja veiggodettiin Du čábbodaga ja dievaslašvuođa muitin virkkosmahttá ja gievrrasmahttá mu goldnan sielu. Vaikke leage dušše goaikkanas; dat, gean Du árpmu viiddisvuohta veahkeha, šaddá geažis áhpin. Ja smávimus atoma, man Du láđisváimmot ustitlašvuohta veahkeha boahtá báitit šearradamos nástin. Govčča Du suodjalussii, O Don buhtisvuođa Vuoigŋa, Don guhte leat Buotveagalaš Sállejeaddji, dán ráhkisvuođa šláva, čuvgejuvvon bálvaleaddját. Veahket su dán leahkima máilmmis bissut nanusin Du ráhkisvuođas ja atte dán lámissoajat lotti gávdnat báhtaransaji ja dorvvu Du ipmillaš beasis, almmálaš muora suojis.

‘Abdu’l-Bahá

Luovvaneapmi

O čuovgga bárdni! Vajálduhte buot earet Mu ja leage oktavuođas vuoigŋasan. Dát lea Mu báhkkuman, leage jegolaš dasa.

Bahá’u’lláh

O Ipmil, Du lusa válmmaštan mun báhtaransaji ja Du mearkkaid guvlui divun váibmun. O Ipmil, mátkki alde dahje ruovttus, doaimmainan dahje barggustan, bijan buot luohttámuššan Dutnje. Udno munnje dasto buotveagalaš veahkkát, nu ahte sáhtán luovvanit buot máilmmálaččas, O Don Guhte leat geažiheapmi árpmusttat! Gárvvis munnje oassán, O Hearrá, nugo Don dáhtot ja atte mu duhtat dasa, maid Don leat munnje mearridan. Dus lea dievas váldi mearridit.

Báb

Alladeamos rohkosis olbmot rohkadallet dušše beare ráhkisvuođas Ipmilii, eaige danin, ahte ballet Sus dahje helvehis dahje sávvet skeaŋkka dahje albmái beassama. – – Go olmmoš ráhkásmuvvá nuppi olbmui, sutnje lea veadjemeahttun leat dajakeahttá ráhkkásis nama. Man olu váddásut leage leat máinnaškeahttá Ipmila nama, go lea ráhkásmuvvan Sutnje. – – Vuoiŋŋalaš olmmoš ii gávnna miellabuori masge earás go Ipmila muittašeamis.

‘Abdu’l-Bahá

Dearvvasvuohta

Du namma lea mu buorideapmi, O Ipmil, ja Du muitin lea munnje dálkkas. Lagašvuohta Dutnje lea mu doaivu ja ráhkisvuohta Dutnje lea mu guoibmi. Du árbmu mu guovdu lea mu buorideapmi ja mu dorvu sihke dán máilmmis ja dan máilmmis, mii boahtá. Duoðalaččat, Don leat Buotveagalaš, Buotdiehtti, Buotviissis.

Bahá’u’lláh

Váinniid beales

O leahkima bárdni! Guorahala daguidat juohke beaivve, ovdalgo oaččot bovdehusa guorahallamii.

Bahá’u’lláh

O Ipmilan! Don suttuid ándagassii addi, skeaŋkkáid juohkki, váttisvuođaid eret váldi! Duođalaččat, mun bivddán Du addit suttuid ándagassii daidda, geat leat guođđán eatnánlaš orrunsajiset ja sirdásan vuoiŋŋalaš máilbmái. O Hearrán! Buhtis sin váivviin, váldde eret sin morrašeaset ja nuppástuhte sin sevdnjesvuođa čuovgan. Suova sin lávket lihku šaddogárdái, basa sin buhtásamos čáziin ja divtte sin geahčadit Du šerresvuođa alimus vári alde.

‘Abdu’l-Bahá

Rohkos

Daddjet Ipmila vearssaid iđidiid ja eahkediid. Guhte guođđá daid dajakeahttá, ii leat leamašan oskkáldas Ipmila Lihtus ja Su Testamentasis, ja guhte jorggiha eret dáid bassi vearssain Dán Beaivve, gullá daidda, geat čađa agálašvuođa leat jorggihan eret Ipmilis. Ballet Ipmilis, O Mu bálvaleaddján, juohke áidna.

Bahá’u’lláh

Sivdnádusa máilmmis ii leat mihkkige njálgasut go rohkos. Olmmoš galgá eallit rohkosa dilis. Buot buoremusat sivdniduvvon dilli lea rohkadallama ja átnuma dilli. Rohkos lea ságastallan Ipmiliin. Stuorámus olahus dahje njálgasamos dilli ii leat mihkkige earáid go ságastallan Ipmiliin. Dat ráhkada vuoiŋŋalašvuođa, diđolašvuođa ja almmálaš dovdagiid, bohciidahttá (Ipmila) Váldegotti ođđa geasuheami ja hukse bajit fihtolašvuođa dovdannávccaid.

‘Abdu’l-Bahá

Lii-uv kihheen eres vädisvuođâi meddâl välddee, ko Immeel. Eeđâ, pajedum, liävus Immeel. Sun lii Immeel. Puohah laa Suu palvâleijeeh já puohah vuáláneh Suu táátun.

Báb